Busturialdeko Hitza

Txirrindulari talde biren aurkezpena, zapatuan

Mendata Bikezona Conor eta Bikezona Marin taldeetako txirrindulariak entrenamendua egingo dute BTT zentroan.

D. Lauzirika

Zapatu goizean Bikezona Conor eta Bikezona Marin mendiko bizikletako taldeen aurkezpena egingo dute Elizaldeko BTT zentroan. Aurkezpen ekitaldia 12:30ean hasiko da.

Iaz elite eta 23 urtez azpikoen lasterketetan hainbat garaipen lortu zituzten Bilboko talde horiek BTT zentroa aukeratu dute 2008 denboraldiari hasiera emateko. Ohiko adierazpen eta talde argazkiez gain, entrenamendua egingo dute taldeko kideek. Euren materiala ere aurkeztuko dute.

Bi talde, bi modalitate

Bikezona Conor taldeko txirrindulariak mendiko bizikletako XC Rally arloan lehiatzen dira. Maila ezberdinetako zortzi txirrindularik osatzen dute taldea.

Bikezona Marin taldekoen esparrua, berriz, `Down Hill-Dh´ edota mendi-jaitsiera da. Mikel Bergarak eta Ivan Fernandezek osatzen dute taldea.