Busturialdeko Hitza

Bertsolari gazteen harrobia

Mendata Oilarganekoen esanetan, «aurreikuspen guztiak bete dira» aurtengo Bertsolaritzen bertso idatzien sariketan.

danel lauzirika

Oilarganek urtero antolatzen duen Bertsolaritzen sariketak gazteen artean bertsozaletasuna bultzatzea eta bertsolari gazteak bultzatzea du helburu.

Sariketako sailkapen fasean hainbat ikastetxeetako berrehun ikaslek parte hartu ondoren, domekan 60 ikasle izan ziren Elizalden.

Oilargane elkarteko kideen esanetan, «iaz baino partaide gehitxoago izan ditugu, eta aurreikuspen guztiak bete dira. Umeak sari bakoitzaren zenbakia esaterakoan saltoka hasten ziren. Bertso eta bertsolaritzarentzat egun eder bat izan zen».

Jon Lopategi, Abel Muniategi, Jon Enbeita eta Karlos Ibarzabal aritu ziren epaile lanetan. Bapateko bertsoak ere ez ziren falta izan. Xabier Amurizak hiru bertso abestu zituen agur legez.

Beitiatarrak nagusi

A mailan Bermeoko Oihane Egañak jantzi zuen txapela. Bigarren Beñat Alonso zornotzarra sailkatu zen. B mailan Gautegiz Arteagako Goretti zarrabek eskuratu zuen txapela. Eneritz Iturbe gernikarra izan zen txapeldunorde. Nagusien mailan aitor Beitia bermeotarrak jantzi zuen txapela, eta bere arreba Nagore izan zen bigarren.